У інтэрв'ю, апублікаваным у апошнім нумары штотыднёвіка «Sieci», польскага амбасадара ў Берліне спыталі, ці Нямеччына ўсё яшчэ зʼяўляецца краінай, якая можа ўразіць.
Многія дзесяцігоддзі Нямеччына паспяхова дасягала пастаўленых мэтаў і ўспрымалася як узор для пераймання. Палітыка Германіі ў дачыненні да Расіі праводзілася паводле двух прынцыпаў: «Wandel durch Handel» (перамены праз гандаль) або «Wandel durch Annaherung» (перамены праз збліжэнне). Сёння бачна, што гэта была ганебная памылка, якую часта прызнаюць і самі немцы, – падкрэсліў польскі амбасадар у Нямеччыне.
Дарыюш Паўлось дадаў, што «яшчэ адным элементам, які пераацаніў дамінуючую ролю Берліна, зʼяўляецца безумоўна расійскі напад на Украіну.
Гуманітарная і ваенная дапамога Германіі
Гуманітарная і, перш за ўсё, ваенная дапамога, прапанаваная Германіяй у самым пачатку вайны, аказалася далёкай ад чаканняў не толькі ўкраінскага боку, але і іншых еўрапейскіх партнёраў, – сказаў польскі амбасадар.
Адказваючы на пытанне аб уплыве Германіі на адносіны Польшчы з Еўрапейскай камісіяй, Паўлось адзначыў, што Нямеччына несумненна зʼяўляецца найбуйнейшай эканомікай на Старым кантыненце і самым вялікім платнікам у бюджэт ЕС.
«Аднак нас хвалюе вось што: каб рашэнні, якія прымаюцца на форуме ЕС, ставілі ўсіх членаў супольнасці ў роўныя ўмовы, каб нам не даводзілася мець справу з лепшымі і горшымі краінамі. Гэта несправядліва», адзначыў ён.
Гэта бачна, калі справа даходзіць да выплаты Польшчы сродкаў з Нацыянальнага плану рэканструкцыі. (Нямеччына дамагаецца, каб Польшча спачатку выканала ўмовы выстаўленыя ЕК Польшчы- рэд.)
Гэтыя сродкі патрэбныя Польшчы і пасля пандэміі, і асабліва ва ўмовах вайны ва Украіне, бо гаспадаркі яе суседзяў павінны быць моцнымі, тлумачыў амбасадар Паўлось.
Пазіцыя ўраду ФРГ і нямецкіх чыноўнікаў у ЕС у адносінах да Польшчы
Паводле польскага дыпламата, «бескампрамісная пазіцыя ўраду ФРГ і нямецкіх чыноўнікаў у ЕС па гэтым пытанні не зусім зразумелая нават для нямецкай прамысловасці, якая мае свае заводы ў Польшчы або цесна супрацоўнічае з польскімі партнёрамі». Такім чынам, палітыкі ствараюць парадокс, таму што немцы, блакуючы выплату грошай ЕС для Польшчы, шкодзяць і сабе, найперш сваім прадпрымальнікам, сказаў у інтэрвʼю для тыднёвіка «Sieci» амбасадар Польшчы ў Берліне Дарыюш Паўлось.
яс