Удзельнікі шэсця сабраліся каля Лядовага палаца ў 14 гадзін і пачалі рушыць у цэнтр горада. Людзі неслі бела-чырвона-белыя сцягі, скандавалі лозунгі. Праходзячы міма хаты, дзе жывуць бацькі палітвязня Паўла Севярынца, віцябляне скандавалі: «Пашу на волю!» На скрыжаванні праспектаў Будаўнікоў і Чарняхоўскага міліцыя не прапускала калону ў цэнтр горада, аднак людзі прадралі кардон і прайшлі наперад, было затрымана два чалавекі.
Паралельна з калонай рухаліся прадстаўнікі віцебскага аддзялення Беларускага Чырвонага Крыжа, якія гатовы былі аказаць дапамогу пацярпелым. Пратэстоўцы прыйшлі на плошчу Перамогі – але там іх чакала міліцыя. Таму людзі пайшлі дварамі. Спачатку яны выйшлі на вуліцу Чкалава, потым на Маскоўскі праспект. Акцыя завяршылася ў 17 гадзін супольным фота на прыступках Лядовага палаца.
Паводле дадзеных МУС, у Віцебскай вобласці затрымана 18 удзельнікаў пратэставых акцый.
Для Беларускай службы Польскага радыё Святаслаў Бруйко