Аляксандр Лукашэнка ня будзе размаўляць з Захадам, пакуль там ня здымуць «антыбеларускія санкцыі».
«Вызначым месца, будзем сустракацца, абмяркоўваць. Але пакуль не будуць знятыя гэтыя бязмозглыя санкцыі і прыніжэнне нашых патрыятычных людзей, размаўляць з імі не будзем, на калені не станем», – прыводзіць словы Лукашэнкі ягоная прэс-служба, аб чым піша Радыё Свабода.
Ён таксама назваў «несаліднымі паводзінамі» спробы Бруселю націснуць на яго праз Маскву. Маўляў, абазнаны, што старшыня Еўрапейскай рады Шарль Мішэль прасіў прэзідэнта Уладзіміра Пуціна паспрыяць у вырашэнні розных пытанняў.
«Заходзяць, прабачце мяне, як сабакі пабітыя, прытым у дробязях: па спорце, культуры, іншых напрамках. Пачынаюць нашых хлопцаў ціснуць ні за што: выйшаў Баскаў (экс-старшыня Федэрацыі хакея – рэд.) са сцягам за прэзідэнта – вораг, патрабуем выключыць з федэрацыі. Мярзотнікі дробязныя. Сапраўды несалідныя паводзіны», – канстатаваў Лукашэнка.
Ён адзначыў, што дыялог з еўрапейскімі краінамі вядзецца. Але яго «напружвае», што патрабаванні тычацца ўнутранай палітыкі Беларусі – выбараў, палітвязняў і г.д. На гэта Лукашэнка параіў «заняцца сваімі праблемамі, якія еўрапейцы не могуць вырашыць».
Сітуацыю з мігрантамі на еўрапейскай мяжы таксама назваў праблемай Захаду. Маўляў, раней там заявілі, што гатовыя прыняць усіх уцекачоў з Афганістану ды іншых краін, а цяпер выганяюць іх са сваёй тэрыторыі, «нацкоўваючы сабак і страляючы па-над галовамі».
нг