Са жніўня, з пачатку міграцыйнага крызісу, на польска-беларускай мяжы польскія памежнікі зафіксавалі ўжо 33 тыс. 200 спробаў нелегальнага пранікнення ў краіну, расказалі ў польскай Памежнай службе.
Пры гэтым за ўвесь мінулы год такіх спробаў было толькі 88, паведамляе «Еўрарадыё».
Тым не менш, учора зноў былі зафіксаваныя сотні спробаў мігрантаў прарвацца ў Польшчу. Польская памежная служба паведамляе, што 11 лістапада былі заўважаныя 223 спробы парушыць мяжу. У дачыненні да 26 чалавек была вынесеная пастанова з патрабаваннем пакінуць тэрыторыю краіны. Затрыманыя тры чалавекі – двое грамадзян Ірака і грамадзянін Сірыі.
Цяпер на беларуска-польскай мяжы знаходзіцца некалькі тысяч мігрантаў, якія хочуць праз Польшчу трапіць у Германію. Крызіс абвастрыўся ў пачатку гэтага тыдня. Польскаму боку давялося павялічыць сілавую прысутнасць на мяжы, суседняя Літва ўвяла ў прыгранічных раёнах надзвычайнае становішча.
У краінах ЕС, а таксама ў ЗША і Вялікабрытаніі лічаць, што крызіс створаны рэжымам Лукашэнкі і што дыктатар выкарыстоўвае мігрантаў для навязвання сваіх палітычных інтарэсаў ва ўзаемаадносінах з краінамі ЕС.
вс