Развітанне з паэтам Анатолем Вярцінскім пройдзе заўтра, 23 красавіка, ў рытуальнай залі на вул. Альшэўскага, 12 у Мінску. Пачатак а 12-й гадзіне.
Вядомы беларускі паэт, перакладчык, публіцыст Анатоль Вярцінскі пайшоў з жыцця 21 красавіка на 91-м годзе жыцця.
Акрамя вершаў Вярцінскі пісаў п'есы для дзяцей і перакладаў на беларускую са шматлікіх еўрапейскіх моваў.
У 1986-1990 гадах быў галоўным рэдактарам штотыднёвіка «Літаратура і мастацтва». Менавіта ў той час на яго старонках пачало зʼяўляцца шмат артыкулаў па гісторыі і культуры Беларусі, у тым ліку артыкул Зянона Пазняка і Яўгена Шмыгалёва пра Курапаты.
Вярцінскі быў дэпутатам Вярхоўнага Савета Беларусі XII склікання, удзельнічаў у распрацоўцы тэксту Канстытуцыі Беларусі 1994 года.
Публікуем верш Вярцінскага "Два полі", актуальны для нашага часу:
Было ў салдата два полі,
поле, дзе кветкі ірваў,
бегаў з сябрамі на волі,
і поле, дзе ён ваяваў.
Ціха было і чыста
У полі яго дзяцінства,
былі агонь і дым
на полі ратным тым.
Два полі было ў салдата.
Адно зелянела травой,
другое было ўзарата
вайной і паліта крывёй.
Было ў салдата два полі,
поле, дзе кветкі збіраў,
бегаў з сябрамі на волі,
і поле, дзе ён паміраў.
1976
вх