Святлана Ціханоўская правяла перамовы з міністрам замежных спраў Партугаліі Жуанам Кравіньё. Галоўнай тэмай размовы сталі санкцыі супраць паставак беларускіх калійных угнаенняў, піша ТГ-канал «Позірк».
Як расказаў галоўны дарадца Ціханоўскай Франак Вячорка, анлайн-гутарка доўжылася 40 хвілін. Ціханоўская заявіла, што недапушчальна змякчаць санкцыі супраць «Беларуськалія» і транзіту калійных угнаенняў.
«Гэта па сутнасці дэвальвуе ўсе намаганні Еўрапейскага звязу і перашкаджае еўрапейскаму адзінству», – цытуе Вячорка словы Ціханоўскай. Таксама беларускі палітык выступіла за ўвядзенне новых санкцый ЕЗ, але не ўзамен на змякчэнне старых.
Таксама падчас размовы абмяркоўвалася сітуацыя з пастаўкамі ўгнаенняў у краіны Афрыкі і Паўднёвай Амерыкі, якія залежаць ад беларускага калію. Ціханоўская кажа, што ўжо ідзе пошук магчымасцяў дыверсіфікацыі.
эж