У межах кампаніі салідарнасці #WeStandBYyou, якую ўжо многія гады вядзе праваабарончая арганізацыя Libereco, сябра Бундэстага Германіі Мары-Агнес Штрак-Цымерман стала сімвалічнай «хроснай» для лаўрэата Нобелеўскай прэміі міру Алеся Бяляцкага.
«Аўтакраты не баяцца нічога больш, чым тых, хто адстойвае дэмакратыю і незалежнасць ва ўмовах свабоды. Як прыхільніца дэмакратыі і лібералізму, я асабліва заклапочаная абаронай правоў і свабод кожнага чалавека.
Таму сёння я з радасцю раблюся сімвалічнай хроснай Бяляцкага і заклікаю да вызвалення з беларускага палону яго і ягоных паплечнікаў-актывістаў. Алесь, я з табой!», – напісала дэпутатка.
Libereco таксама запусціла анлайн-петыцыю, якая патрабуе безумоўнага вызвалення Алеся ды іншых палітычных зняволеных у Беларусі. Петыцыя закліканая нагадаць дыпламатычным прадстаўнікам Рэспублікі Беларусь аб міжнародных абавязальніцтвах і заклікаць беларускія ўлады даць базавыя правы чалавека на свабоду слова, сходаў і аб'яднанняў усім людзям у Беларусі без абмежаванняў.
ПЦ «Вясна»
нг