«З 2020 году кіраўніцтва «Гродна Азот» удзельнічае ў здзеках, ціску і палітычных рэпрэсіях у адносінах супрацоўнікаў прадпрыемства. Мы не забыліся карныя рэйды, даносы і масавыя звальненні. Цяпер ваша чарга расплачвацца», — напісала супольнасць на сваім канале, тлумачачы свае дзеянні.
У якасці доказаў узлому супольнасць выкінула некалькі здымкаў з экранаў і відэа.
У прыватнасці, у выніку атакі, паводле сцверджання «Кіберпартызанаў»:
зашыфравана ўнутраная пошта, дакументазварот і сотні працоўных ПК;
знішчаны бэкапы базаў дадзеных, сервераў, пошты, дакументазвароту;
узламаныя сістэмы аховы і камеры назірання;
парушана праца кацельнага цэху.
«Кіберпартызаны» паставілі свае ўмовы:
«Каб аднавіць звесткі, дыктатару давядзецца вызваліць УСІХ палітвязняў „Гродна Азоту“ + 75 палітвязняў з найгоршым станам здароўя (на наша меркаванне). Цяпер мы працавалі акуратна і задзейнічалі толькі малую частку нашых магчымасцяў. Калі адмовіцеся, наступным разам стаўкі будуць яшчэ вышэйшыя».
«Кіберпартызаны» — беларуская дэцэнтралізаваная супольнасць ананімных праломнікаў (хакераў), якая з’явілася ў верасні 2020 году.
Яны атрымалі вядомасць дзякуючы шэрагу паспяховых кібератак на рэсурсы беларускіх дзяржаўных установаў і сілавых структураў, публікацыям кампрамату на прадстаўнікоў апошніх, а таксама размяшчэннем у адкрытым доступе службовай і сакрэтнай інфармацыі.
Супольнасць пачала дзейнасць у адказ на дзяржаўныя рэпрэсіі супраць пратэстоўцаў. Сваю дзейнасць яны называюць барацьбой з Аляксандрам Лукашэнкам. «Кіберпартызаны» актыўна дапамагаюць аб'яднанню беларускіх сілавікоў ВуРol у правядзенні расследаванняў. Таксама «Кіберпартызаны» дапамагаюць палку імя Кастуся Каліноўскага ва Украіне правяраць новых добраахвотнікаў.
ав/Свабода