Усе сродкі, сабраныя падчас марафону салідарнасці «Нам не ўсё адно» былі размеркаваныя паміж фондамі, паведаміла прадстаўніца па сацыяльнай палітыцы Абʼяднанага пераходнага кабінета (АПК) Вольга Гарбунова.
«Гэта сапраўды быў і ёсць няпросты досвед. Многія думаюць, што марафон скончыўся даўно, але насамрэч ён толькі падыходзіць да канца. За гэты амаль год нам удалося ўкараніць сістэму Назіральнай рады, папрацаваць з вялікай колькасцю беларускіх арганізацый, разам прайсці ўсе юрыдычныя цяжкасці. Але галоўнае, сотні семʼяў палітзняволеных атрымалі дапамогу – і гэта ўсё дзякуючы беларусам і беларускам», – заявіла Вольга Гарбунова.
Паводле яе, зараз яшчэ пяці арганізацыям засталося прайсці фінальны аўдыт. У найбліжэйшы час Назіральная рада выйдзе з падрабязнай справаздачай аб правераных патрачаных сродках, сабраных падчас марафону.
Нагадваем, на марафоне сабралі 574 617 еўра. Пасля аплаты камісіі на рахунку засталося 545 740 еўра, у тым ліку 12 тысяч еўра ў крыптавалюце.
206 071,63 еўра – накіравалі ў фонд салідарнасці BY_help.
100 тысяч еўра для перадачы семʼям палітвязняў атрымаў фонд салідарнасці BySol, 60 тысяч еўра – дабрачынны фонд «Краіна для жыцця».
Па 40 тысяч еўра атрымалі – Беларуская асацыяцыя палітвязняў «Да волі» і «Анархічны чорны крыж – Беларусь».
Па 28 тысяч еўра атрымалі – Фонд дапамогі беларусам у Літве Razam і праваабарончая ініцыятыва дапамогі палітвязням Dissidentby.
Дабрачынная арганізацыя Littouwin Lions Club атрымала 15 тысяч еўра, падобным чынам, як Беларуская Рада культуры.
Па 5 тысяч еўра атрымалі: Медыяпраект дапамогі беларускім палітзняволеным жанчынам «Палітвязынка» і Фонд Медыцынскай Салідарнасці Беларусі.
аз