Асноўным прыярытэтам Міжнароднага гуманітарнага фонду дапамогі беларускім палітвязням будзе падтрымка тых, хто знаходзіцца ўнутры Беларусі, паведаміў галоўны саветнік дэмакратычнага лідара Святланы Ціханоўскай Франак Вячорка ў Сусветны дзень гуманітарнай дапамогі, які адзначаецца па ініцыятыве Генасамблеі ААН 19 жніўня, нагадвае «Позірк».
Сродкі будуць накіроўвацца «сем'ям рэпрэсаваных і палітычных зняволеных, на медыцынскую і псіхалагічную дапамогу ўсім тым, хто ў бядзе, усім, хто сутыкнуўся з пераследам у Беларусі».
Паводле дарадцы Ціханоўскай, стварэнне фонду стала вынікам працы дэмсіл і парламентаў шэрагу краін-партнёраў. Першымі, хто ахвяраваў сродкі ў фонд, сталі Нарвегія і Швецыя, нагадаў Вячорка.
«Вызначаць прыярытэты і тых, каму патрэбна дапамога, будзе задачай праваабаронцаў. Задачай Святланы Ціханоўскай будзе знаходзіць гэтую дапамогу, каб як мага больш краінаў ахвяравалі ў фонд сродкі», — падкрэсліў Вячорка.
У будучыні да працы Фонду маглі б падключыцца ЗША, Канада, Вялікабрытанія і іншыя краіны, бо неабходнасць у дапамозе рэпрэсаваным застаецца высокай, а дапамогі пакуль недастаткова, дадаў палітык.
Вячорка таксама заклікаў беларускія дыяспары далучыцца да распаўсюджвання інфармацыі аб фондзе і яго працы.
Нагадваем, 30 красавіка Вячорка паведаміў аб стварэнні па ініцыятыве Ціханаўскай Міжнароднага гуманітарнага фонду ў падтрымку беларускіх палітвязняў, першы ўнёсак у які зрабіла Нарвегія. Прэм’ер-міністр гэтай скандынаўскай дзяржавы Ёнас Гар Стэрэ на сустрэчы з Ціханаўскай 30 красавіка ў Осла паведаміў, што краіна пералічвае ў фонд 10 млн нарвежскіх крон (850 тыс. еўра).
На Стакгольмскай канферэнцыі па Беларусі 21 мая міністр міжнароднага развіцця, супрацоўніцтва і знешняга гандлю Швецыі Ёхан Форссель паведаміў, што ўрад гэтай краіны выдзеліць 5 млн крон (каля 430 тыс. еўра) для Міжнароднага гуманітарнага фонду падтрымкі палітзняволеных Беларусі.
4 жніўня ў Вільнi на канферэнцыі «Новая Беларусь» сузаснавальнік фонду салідарнасці BYSOL Андрэй Стрыжак паведаміў, што да Міжнароднага гуманітарнага фонду для палітычных зняволеных ужо ўваходзяць восем арганізацый.
аз