У снежні 2024 года супрацоўнікі ФСБ затрымалі ў Мінску 29-гадовага мужчыну з Ханты-Мансійскай аўтаномнай акругі Яўгена Убіраева, паведаміла SOTAvision.
Па словах блізкіх Убіраева, у пачатку вайны ён перажываў за сяброў, якія жывуць ва Украіне, і пакутаваў ад моцнай дэпрэсіі. Неўзабаве мужчына «ўрэшце захацеў дапамагчы людзям і абраў такі спосаб суіцыду» — падтрымаць легіён «Свабода Расіі», які ваюе на баку Украіны.
Малады чалавек сфатаграфаваў некалькі ваенных аб'ектаў, але адмовіўся закладваць выбуховае прыстасаванне пад аўто па заданні легіёна. Пасля гэтага куратар пачаў пагражаць Убіраеву здаць яго расійскім спецслужбам, і той з жонкай з'ехаў у Арменію.
Праз паўгода знаходжання ў Арменіі яму прыйшлося рабіць візаран — і для гэтага ў снежні 2024 года мужчына паляцеў у Беларусь. На зваротным шляху Убіраева затрымалі ў мінскім аэрапорце супрацоўнікі ФСБ.
Цяпер ён знаходзіцца ў СІЗА-1 Екацярынбурга. Па артыкуле аб удзеле ў дзейнасці тэрарыстычнай арганізацыі яму пагражае да 20 гадоў калоніі.
Бацька Убіраева раней ваяваў у Чачні, а на вайне ва Украіне апынуўся па кантракце, завербаваўшыся з калоніі ў ПВК «Вагнер». Малады чалавек тэлефанаваў бацьку з Арменіі — і тады вайсковец у адказ паабяцаў вярнуць яго ў Расію «пад канвоем».
вх