Шэраг сябраў Каардынацыйнай рады (КР) і Народнага антыкрызіснага ўпраўлення (НАУ) ужо дапытаны польскімі службамі ў якасці сведкаў па крымінальнай справе аб знікненні экс-старшыні Каардынацыйнай рады Анжалікі Мельнікавай, паведаміў намеснік кіраўніка Аб'яднанага пераходнага кабінета (АПК), кіраўнік НАУ Павел Латушка, піша «Позірк».
Адзначыўшы, што расследаванне ў Польшчы праводзіцца па артыкуле аб незаконным пазбаўленні волі, Латушка ў чарговы раз заклікаў дачакацца афіцыйных версій: «І толькі на падставе гэтага мы зможам зразумець матыў, што адбылося, чаму гэта было зроблена Анжалікай. Або што было зроблена ў адносінах да яе».
На яго думку, інфармацыя ў расследаванні польскага выдання Polityka «па сутнасці, абвяргае версію аб махлярстве, якая гучала публічна вельмі актыўна»: «І таму важна разумець, што ёсць прэзумпцыя невінаватасці. Зараз жа можна казаць аб тым, што найбольш праўдападобнай з'яўляецца версія аб тым, што гэта была дзейнасць спецслужбаў рэжыму, якія вядуць вайну з нашымі дэмакратычнымі інстытутамі і канкрэтна з нашай камандай НАУ».
23 мая выйшла трэцяя частка расследавання Polityka, у якім сцвярджаецца, што Мельнікава магла быць завербаваная ваеннай разведкай Беларусі, агент спецслужбы «суправаджаў яе на Кубу і Шры-Ланку, дзе яна праводзіла водпуск».
Пра тое, што Мельнікава, пра знікненне якой было заяўлена ў канцы сакавіка, вылецела са Шры-Ланкі ў Дубай 7 сакавіка разам з дочкамі, сцвярджалася ў другой частцы расследавання The Insider і Polityka 10 траўня, а пра тое, што 26 лютага яна вылецела з Варшавы ў Лондан, дзе «перасела на самалёт да Шры-Ланкі».
Увесь гэты час экс-спікер КС, як сцвярджаецца, перамяшчалася як грамадзянка Польшчы, якой яна стала напрыканцы 2024 года.
Люблінскі аддзел Дэпартамента па барацьбе з арганізаванай злачыннасцю і карупцыяй Нацыянальнай пракуратуры Польшчы 24 красавіка «праінфармаваў спецыяльным лістом аб тым, што пастановай пракурора ад 16 красавіка гэтага года распачата следства па справе пазбаўлення волі ў дачыненні да Анжалікі Мельнікавай на падставе арт. 189 § 1 (незаконнае пазбаўленне волі) Крымінальнага кодэкса і іншых».
вх