Прэзідэнт Украіны Уладзімір Зяленскі назваў расійскую прапанову правесці перамовы ў Беларусі несур’ёзнай. Як адзначыў палітык у каментары для Reuters, Беларусь не можа быць пляцоўкай для дыялогу, — паведамляе svaboda.org.
«Беларусь — краіна, з якой ляцелі ракеты, і адкуль прыйшлі войскі. Яна саюзнік агрэсара. Таму для нас гэта немагчыма», — сказаў Зяленскі.
Ён зноў пацвердзіў сваю гатоўнасць сустрэцца з Уладзімірам Пуціным асабіста, калі гаворка пойдзе пра неадкладнае абмеркаванне спынення агню без папярэдніх тэхнічных перамоваў:
«Мне ўсё роўна, ці гэта будзе двухбаковая сустрэча, ці трохбаковая — я гатовы да любога фармату», — заявіў Зяленскі 27 траўня.
Паводле яго, цяпер Украіна разглядае некалькі магчымых краін для перамоваў: Турэччыну, Ватыкан і Швейцарыю. Найбольшай падтрымкай карыстаецца Ватыкан, адзіны, каго не задавальняе гэтая пляцоўка, — Расія.
Папярэднія перамовы ў Стамбуле 15–16 траўня не далі вынікаў. У той жа час Расія здзейсніла адзін з найбуйнейшых нападаў дронамі па Украіне.
На перамовах у Стамбуле расійскі бок выставіў максімалісцкія патрабаванні, у тым ліку — поўны вывад украінскіх войскаў з часткова акупаваных абласцей. Гэтыя ўмовы Украіна і яе заходнія партнёры катэгарычна адхіляюць.
эж