Удзел у канферэнцыі «Reshape» возьмуць каля 150 прадстаўнікоў і прадстаўніц грамадскай-палітычнай сферы, сацыяльнага прадпрымальніцтва і журналістыкі.
Канферэнцыя пройдзе ў афлайн-фармаце. Падчас яе правядзення адбудзецца некалькі дыскусій і дэбатаў на тэмы, якія на сённяшні дзень з’яўляюцца актуальнымі для беларускага грамадства.
У праграме «Reshape» заяўленыя:
- Дэбаты «Што нам прынеслі апошнія пяць гадоў» з удзелам Франака Вячоркі, Аліны Харысавай, а таксама Андрэя Ягорава і Лізаветы Пракопчык.
- Дыскусія «Ці верыць Захад у еўрапейскую Беларусь», у якой возьмуць удзел Крыстафер Форст, Еннэс дэ Моль, Вольга Неманежына, Марцін Вайцяхоўскі.
- Выступленні найлепшых выпускніц і выпускнікоў Акадэміі новай беларускай дыпламатыі мінулых гадоў. Мадэраваць панель будзе былы дыпламат Павел Мацукевіч.
- Фінальная дыскусія «2030. Што чакаць ад новай пяцігодкі» з удзелам Арцёма Шрайбмана, Вольгі Лойкі, Аліны Коўшык і Філіпа Біканава.
«За апошнія пяць гадоў свет змяніўся. Чаго мы дасягнулі ў ім, ці засталося ў новым свеце месца для дэмакратычнай Беларусі, як бачаць нашу будучыню замежніцы і замежнікі, і чаго нам чакаць ад новай пяцігодкі – гэта будзем абмяркоўваць на Reshape 2025», – адзначаюць арганізатары канферэнцыі.
Канферэнцыя «Reshape» праводзіцца пачынаючы з 2017 году. Апошні раз у Беларусі яна праводзілася ў афлайн-фармаце ў 2019-м. У 2021 і 2022 гадах яе ўдзельнікі сустракаліся ў анлайн з-за каранавірусу. Апошні раз месцам правядзення канферэнцыі была Варшава ў 2023 годзе.
Падрабязнасці можна паглядзець на сайце канферэнцыі «Reshape».
belsat.eu/вх