Аб падпісанні 9 ліпеня пагаднення аб стварэнні ў Навагрудку (Гродзенская вобласць) першага нацыянальнага музею Халакоста ў Беларусі піша партал газеты англа-яўрэйскай супольнасці Jewish News.
Як зазначаецца, дакумент падпісалі кіраўнік раёна Сяргей Чаркоўскі, старшыня Саюза беларускіх яўрэйскіх грамадскіх аб'яднанняў і абшчын (СБЯТАА) Артур Ліўшыц і кіраўнік праўладнага Беларускага фонду міру Максім Місько.
Месца для музея «абрана не выпадкова» – у горадзе ў гады нацысцкай акупацыі было забіта 11 тыс. габрэяў, піша выданне.
Акрамя таго, у Навагрудку 26 верасня 1943 года 250 вязняў гета «ажыццявілі самыя буйныя задакументаваныя ўцёкі праз тунэль у акупаванай нацыстамі Еўропе», які яны таемна капалі на працягу пяці месяцаў.
Шмат хто з уцекачоў пазней далучыўся да Бельскіх партызанаў – адзінага цалкам габрэйскага партызанскага атрада ў Беларусі.
Дэбра Брунэр, сузаснавальніца дабрачыннай арганізацыі The Together Plan, сказала Jewish News з гэтай нагоды:
«Гісторыя партызанаў Бельскага, увечненая ў фільме «Выклік«, – гэта гісторыя не проста супраціву, а выратавання, трываласці і супольнасці».
Яна дадала, што музей будзе «ўшаноўваць не толькі памяць ахвяраў, але таксама адвагу і чалавечнасць тых, хто змагаўся, часта маючы толькі волю выжыць і абараніць іншых».
Музей хочуць стварыць на тэрыторыі былога габрэйскага гета ў Наваградку побач з цяперашнім Музеем габрэйскага супраціву ў гістарычных будынках.
Афіцыйнага пацверджання інфармацыі аб падпісанні пагаднення пакуль няма.
вх