Аршанскі мясакамбінат абвясціў дадатковы выпуск сваіх акцый – 20 млн акцый на агульную суму 3 млн рублёў. Мэтай эмісіі заяўлены зварот часткі сумы грашовых сродкаў, выдаткаваных з бюджэту Аршанскага раёна ў 2018-2021 гг. на рэалізацыю інвестпраекта па будаванні фермы ў в. Чурылава.
Аднак гэтая ферма – рабатызаваны комплекс «Паўлінка», належыць іншаму прадпрыемству – агракамбінату «Юбілейны». З гэтага вынікае, што Аршанскі мясакамбінат будзе разлічвацца па абавязках за іншае прадпрыемства.
Пры гэтым мясакамбінат і сам не можа выйсці з цяжкага становішча. Як мінімум вядома, што ў апошнія месяцы працаўнікі атрымліваюць там заработную плату са спазненнямі. Аднак улады вырашылі і ў гэты раз вярнуць грошы ў бюджэт сваім старым спосабам – перакласці абавязкі праблемнага прадпрыемства на буйнейшае.
Для Беларускай службы Польскага радыё Святаслаў Бруйко, Віцебск