17 верасня мінула пяць гадоў з моманту, як каля свайго дому ў Мінску была затрыманая каардынатарка Валанцёрскай службы «Вясны» Марфа Рабкова. З тых часоў яна ўтрымліваецца за кратамі паводле сфабрыкаваных абвінавачванняў. У пятую гадавіну затрымання сваёй каляжанкі праваабаронцы «Вясны» выйшлі на акцыю салідарнасці ў цэнтры Вільні.
Прадстаўніца кампаніі #FreeViasna Марына Кастылянчанка адзначае, што палітзняволеная ўвесь гэты час знаходзіцца за кратамі ў жудасных умовах, без належнай медычнай дапамогі, з шэрагам абмежаванняў, у тым ліку ў кантактах са знешнім светам.
«Мы ўжо даўно не атрымоўваем навінаў і дакладна не ведаем, як там наша Марфа. Усё, што мы маем, гэта абрывістую інфармацыю ад тых палітзняволеных жанчын, што выходзяць на волю і нешта распавядаюць», – тлумачыць сітуацыю праваабаронца.
Праваабаронцы выйшлі на акцыю салідарнасці, бо ў сітуацыі змушанай цішыні вельмі важна казаць пра Марфу:
«Гэтым разам мы падрыхтавалі своеасаблівыя фота-літары з выявамі Марфы, каб звярнуць увагу на яе няпростую долю ў беларускай вязніцы. Мы па-ранейшаму настойваем на неадкладным і безумоўным вызваленні Мафры, бо яна павінна быць вольнай», – кажа Марына Кастылянчанка.
У пятую гадавіну адвольнага затрымання Мафры Рабковай прадстаўнікі 30 праваабарончых арганізацый, уключна з Міжнароднай федэрацыяй за правы чалавека (FIDH) і Сусветнай арганізацыяй супраць катаванняў (OMCT), у межах Абсерваторыі па абароне праваабаронцаў, зноў заклікаюць да яе неадкладнага і безумоўнага вызвалення.
аз