Аляксандр Лукашэнка 31 кастрычніка падпісаў указ аб прымяненні спецыяльнага абмежавальнага захаду. Як адзначаецца ў апублікаваным на Нацыянальным прававым інтэрнэт-партале Беларусі ўказе, уводзіцца забарона на выкарыстанне тэрыторыі Беларусі для перамяшчэння грузавых аўтамабіляў і цягачоў, зарэгістраваных у дзяржавах Еўрапейскага Саюза, паведамляе «Свабода».
Рух па беларускай тэрыторыі забаранілі для прычэпаў, зарэгістраваных у Польшчы і Літве, а таксама легкавых аўтамабіляў, зарэгістраваных у Польшчы, што выконваюць міжнародныя перавозкі адпаведна з індывідуальнымі накладнымі або міжнародна-транспартнымі накладнымі CMR.
Гэтыя абмежаванні будуць дзейнічаць да 31 снежня 2027 года.
Раней паведамлялі аб забароне літоўскім грузавікам выязджаць цераз польскую і латвійскую мяжу.
Да 27 кастрычніка памежная служба Літвы падчас залёту шароў з кантрабанднымі цыгарэтамі двойчы цалкам закрывала мяжу з Беларуссю на некалькі гадзін уначы. А з 27 кастрычніка закрыла яе для беларусаў цалкам.
Праз палёты шароў за восень 9 разоў закрывалі паветраную прастору над Віленскім аэрапортам. У тым ліку адзін раз ужо пасля поўнага закрыцця мяжы – 30 кастрычніка. Закрыццё мяжы будзе дзейнічаць да гадзіны ночы 1 снежня па беларускім часе – з магчымасцю падаўжэння.
28 кастрычніка Польшча заявіла, што гатовая адкрыць два памежныя пераходы з Беларуссю ў лістападзе. Але 30 кастрычніка пасля кансультацый з Літвой перанесла гэты неназваны тэрмін яшчэ на некалькі тыдняў.
31 кастрычніка Аляксандр Лукашэнка заявіў, што рашэнню Польшчы пра адкрыццё памежных пераходаў папярэднічала дамоўленасць пра вызваленне Анджэя Пачобута і іншых палітвязняў. І цяпер яна таксама адкладзеная.
аз