У Беларусі 13 снежня адбылося чарговае вызваленне палітвязняў. Памілаванне адбылося пасля перамоў Лукашэнкі з амерыканскай дэлегацыяй на чале з Джонам Коўлам. На дадзены момант вядома пра вызваленне 123 чалавек, у тым ліку грамадзяніна ЗША, Аўстраліі, Японіі, Польшчы, Літвы і Латвіі ды 5 грамадзян Украіны, пра што паведаміў Уладзімір Зяленскі.
Лукашэнкаўскія прапагандысты заявілі, што вызваленне палітвязняў адбылося, «у межах дасягнутых дамоўленасцяў з прэзідэнтам ЗША Дональдам Трампам і па яго просьбе, у сувязі з адменай незаконных санкцый супраць калійнай галіны Рэспублікі Беларусь, уведзеных адміністрацыяй папярэдняга прэзідэнта ЗША Байдэна, і ў сувязі з пераходам у практычную плоскасць працэсу адмены іншых незаконных санкцый супраць Рэспублікі Беларусь».
Праваабарончы цэнтр «Вясна» збірае інфармацыю пра вызваленых. На дадзены момант вядома прозвішчы 16 чалавек:
кіраўнік і заснавальнік Праваабарончага цэнтру «Вясна», лаўрэат Нобелеўскай прэміі міру Алесь Бяляцкі;
праваабаронца «Вясны» Валянцін Стэфановіч
праваабаронца «Вясны» Уладзь Лабковіч;
юрыст Максім Знак;
журналістка, галоўная рэдактарка знішчанага ўладамі TUT.BY Марына Золатава;
былы прэтэндэнт у кандыдаты на пасаду прэзідэнта Віктар Бабарыка;
беларускі палітык, адзін з заснавальнікаў і лідараў моладзевага руху «Малады фронт» Павал Севярынец;
палітолаг Аляксандр Фядута;
грамадзянка Літвы Марыя Батальёнак, асуджаную за «стварэнне экстрэмісцкага фармавання або ўдзел у ім»;
грамадзянін Польшчы Раман Галуза, асуджаны за «здраду дзяржаве», за кратамі ўтрымліваўся з ліпеня 2022 года;
грамадзянка Латвіі Ала Сакаленка, якой прызначылі сем гадоў за «агентурную дзейнасць»;
кіраўніцы выбарчага штаба Віктара Бабарыкі Марыя Калеснікава
грамадзянін Японіі Наканісі Масатосі, асуджаны да сямі гадоў калоніі за «агентурную дзейнасць»;
Ілля Князеў, асуджаны за ўдзел у пратэстах да трох гадоў няволі;
грамадзянка ЗША беларускага паходжання Наталля Бельская;
Вячаслаў Папшо, вядомы як блогер «Жыве»;
Аляксандр Сырыца, баскетбольны суддзя і грамадзянін Аўстраліі беларускага паходжання, асуджаны ў красавіку 2025 года за каментары.
Прэс-сакратар МЗС Польшчы паведаміў пра тое, што Андрэя Пачобута няма сярод вызваленых палітвязняў. Па словах Святланы Ціханоўскай, Анджэй Пачобут быў у спісе, але яго не вызвалілі.
Крыніца: ПЦ «Вясна»/юл