Мінгарвыканкам наладжвае новыя, больш эфектыўныя формы прафілактычнай работы з моладдзю. З гэтай мэтай ў Мінскім дзяржаўным палацы дзяцей і моладзі пачала працу новая інтэрактыўная прафілактычная пляцоўка «Бяспечная прастора», паведамляе агенцтва «Мінск-Навіны».
На ёй школьнікаў будуць вучыць правілам паводзін у інтэрнэце, тлумачыць рызыкі, звязаныя з наркотыкамі і кіберзлачыннасцю, паказваць, да якіх наступстваў могуць прывесці неабдуманыя крокі.
«Удасканальваюцца спосабы ўцягвання дзяцей у злачынную дзейнасць, звязаную з распаўсюджваннем наркотыкаў, расце колькасць кіберзлачынстваў. Ашуканцы вымагаюць у дзяцей зберажэнні, назапашаныя бацькамі. Таму разам з ГУУС мы выбудавалі сістэмную работу па прафілактыцы і асвеце моладзі», – адзначыў намеснік старшыні Мінгарвыканкама Андрэй Стрыгельскі.
Паводле яго, такая інтэрактыўная пляцоўка – не першая ў сталіцы: аналагічная ўжо дзейнічае ў адукацыйным цэнтры МНС. Аднак «Бяспечная прастора» арыентавана менавіта на прафілактыку кіберпагроз і злачынстваў, звязаных з наркотыкамі.
Як расказаў начальнік упраўлення па наркакантролі і супрацьдзеянні гандлю людзьмі ГУУС Мінгарвыканкама Кірыл Беркозаў, асноўная мэта пляцоўкі – навучыць дзяцей бяспечным паводзінам у сетцы, зберагчы іх ад удзелу ў кіберзлачынствах, незаконным абароце наркотыкаў і злачынствах супраць палавой свабоды непаўналетніх.
«Пляцоўка будзе працаваць штодня. Навучэнцы школ будуць наведваць яе на пастаяннай аснове, удзельнічаць у трэнінгах і інтэрактыўных комплексах», – адзначыў ён.
Экспазіцыя складаецца з некалькіх лакацый. Адна з самых эмацыйна моцных – імітацыя турэмнай камеры.
«Тут расказваюць гісторыю асуджаных падлеткаў: 17-гадовых дзяўчынкі і хлопчыка, якія адбываюць працяглыя тэрміны за збыт наркотыкаў. У фармаце «жывога эфіру» яны расказваюць, як былі ўцягнутыя ў злачынную дзейнасць, страцілі свабоду і ўжо ў месцах пазбаўлення волі пераасэнсавалі сваё жыццё», – патлумачыў Беркозаў.
Яшчэ адна лакацыя – прастора з VR-ачкамі. Дапаўняюць пляцоўку інтэрактыўныя экраны з тэстамі па кібербяспецы. Школьнікам прапануюць вызначыць, ці бяспечная спасылка, ці варта пераходзіць па ёй, ці хаваюцца за паведамленнем ашуканцы.
аз