Як паведаміла агенцтва BNS, адным з элементаў гэтага ціску сталі гібрыдныя атакі з парушэннем паветранай прасторы як няздольнасць Літвы і НАТА да абароны.
Паводле літоўскіх вайскоўцаў, у расійскіх інфармацыйных каналах шмат гаварылася пра пачатую НАТА місію па назіранні за Балтыйскім морам «Балтыйскі вартавы» (Baltic Sentry), што сведчыць аб надзвычайнай важнасці для Крамля дзейнасці яго ценявога флоту.
— У 2025 годзе мы назіралі дзейнасць Расіі і Беларусі, якая працягвалася па інфармацыйным ціску, мэтай якога з’яўляецца ўплыў як на літоўскую, так і на заходнюю, а таксама ўнутраную аўдыторыю, — сказаў дырэктар Дэпартаменту стратэгічных камунікацый Узброеных сіл Літвы Лютаўрас Багачунас.
Летась у Літву заляцелі два расійскія беспілотнікі «Гербера», паветраную прастору парушалі расійскія знішчальнікі, а таксама павялічыўся лік інцыдэнтаў, звязаных з запускам з Беларусі кантрабандных паветраных шароў, праз што неаднаразова закрываўся Віленскі аэрапорт, а таксама фіксаваліся парушэнні інфраструктуры ў Балтыйскім моры.
— Мэтай інфармацыйнага ціску з’яўляецца дэманстрацыя таго, што дачыненні паміж Літвой і Беларуссю абсалютна ірацыянальныя, агрэсіўныя і шкодныя для самой Літвы, — дадаў Багачунас.
Паводле яго, кожны інцыдэнт выкарыстоўваецца як прыклад таго, што Літва і НАТА няздольныя абараняцца, і з'яўляюцца спробай стымуляваць у Літве недавер да інстытутаў, раскалыхваць грамадства і спрабаваць зламаць імкненне грамадства да супраціву.
У беларускай інфармацыйнай прасторы таксама паведамлялася, што Літва правакуе і сама запускае кантрабандныя шары, каб абвінаваціць Беларусь.
— Мы хочам падкрэсліць, што мы бачым, назіраем, робім гэта дастаткова паспяхова, і гэта іх вельмі нярвуе, — дадаў кіраўнік дэпартаменту.
Асобна эксперты звярнулі ўвагу на тое, што пытанням абароны і бяспекі Літвы ў інфармацыйнай прасторы Беларусі і Расіі былі прысвечаныя прыблізна 70% публікацый. У іх, з аднаго боку, спрабавалі пераканаць, што «мілітарызацыя» ўсходніх межаў стварае пагрозы для Беларусі і Расіі, а з іншага — прадстаўлялі абаронную палітыку НАТА як неэфектыўную, дарагую, якая вядзе да зніжэння дабрабыту грамадзян Літвы і краін НАТА.
Паводле вайскоўцаў, усе гэтыя інцыдэнты накіраваныя на запалохванне заходніх грамадстваў, а таксама на зніжэнне дапамогі Украіне.
Свабода/ав