Экс-палітвязні звярнуліся да экспертаў ААН з-за пераследу па артыкуле аб непадпарадкаванні адміністрацыі калоніі

Цяпер, па гэтым артыкуле, працягваюць знаходзіцца ў калоніях, як мінімум, 50 чалавек, асуджаных па палітычных матывах.

Ілюстрацыйнае фота.

Shutterstock/FotoDax

Экс-палітвязні звярнуліся да экспертаў ААН па Беларусі, а таксама да кіраўніка дэлегацыі Еўрапарламента па сувязях з дэмакратычнай Беларуссю з прычыны пераследу па артыкуле аб непадпарадкаванні адміністрацыі калоніі (артыкул 411 КК). Акрамя таго, зварот быў накіраваны спікеру Сейма Літвы, а таксама беларускім нобэлеўскім лаўрэатам — пісьменніцы Святлане Алексіевіч і праваабаронцу Алесю Бяляцкаму (таксама былому палітвязню), паведамляе «Медыязона».

У звароце яны заклікаюць на міжнародным узроўні ўзнімаць пытанне аб скасаванні 411-га артыкула, а таксама вызваленні асуджаных па ім палітвязняў. Па дадзеных тых, хто звярнуўся, па гэтым артыкуле былі асуджаныя каля 80 чалавек. Цяпер працягваюць знаходзіцца ў калоніях па гэтым артыкуле, як мінімум, 50 чалавек, асуджаных па палітычных матывах.

— З дапамогай гэтага артыкула злачынны рэжым прымушаў нас пісаць прашэнні аб памілаванні на імя ўзурпатара, удзельнічаць у прапагандысцкіх відэаматэрыялах з мэтай дыскрэдытацыі беларускага дэмакратычнага руху, а таксама даваць згоду на так званае канфідэнцыйнае супрацоўніцтва. Заяўляем, што на сёння артыкул 411 з'яўляецца інструментам катаванняў і механізмам бясконцай пралангацыі палітычнага закладніцтва, а па сутнасці — эквівалентам пажыццёвага заняволення. Ягонае прымяненне вядзе да цяжкіх фізічных і псіхалагічных пакутаў палітвязняў, — сказана ў звароце.

Зварот падпісалі вызваленыя палітвязні (некаторыя з іх былі самі асуджаныя па некалькі разоў па 411-м артыкуле КК) Павел Вінаградаў, Алена Гнаук, Мікола Дзядок, Юрый Зянковіч, Аляксандр Казлянка, Дзмітрый Казлоў, Ігар Карней, Вікторыя Кульша, Павел Севярынец.

аз