Прэзідэнт Узбекістана Шаўкат Мірзіёеў адправіў у адстаўку амбасадара краіны ў Беларусі Рахматулу Назарава. Паводле афіцыйнай версіі, прычынай стала «абыякавае стаўленне» да пытанняў прыцягнення інвестыцый і развіцця знешняга гандлю.
Як паведамляе «Белсат», рашэнне было прынятае на фоне крытыкі працы шэрагу ўзбекскіх дыпламатаў. Назараў займаў пасаду з лютага 2024 года. Тады Мінск і Ташкент дамовіліся рэалізаваць інвестыцыйныя і экспартныя праекты больш як на 1 млрд долараў, а ўжо ў сакавіку 2026-га амбасадар заяўляў пра намер павялічыць таваразварот да 2 млрд долараў.
Адстаўка ўзбекскага амбасадара адбылася неўзабаве пасля скандалу з узбекскімі працоўнымі мігрантамі ў Беларусі, якія паскардзіліся на нізкія заробкі і ўмовы працы. Пасля гэтага Мірзіёеў запатрабаваў забяспечыць выкананне дамоўленасцяў, дасягнутых падчас перамоў з Аляксандрам Лукашэнкам.
эж