Ініцыятыва «Сумленныя людзі» прапанавала грамадзянам Беларусі пачаць працэдуру адклікання дэпутатаў Палаты прадстаўнікоў Нацыянальнага Сходу Рэспублікі Беларусь. Людзі па ўсёй краіне далучаюцца да збору подпісаў па адклiканню дэпутатаў.
Мерапрыемства было анансаванае і ў Віцебску. Жыхарам горада, а гэта чатыры выбарчыя акругі, прапанавалі прыйсці 29 жніўня а 15:00 да лесвіцы каля Успенскага сабора і пакінуць свой подпіс за адкліканне дэпутатаў парламента. Аднак, улады ўсяляк перашкаджалі правядзенню мерапрыемства. Да пачатку збору подпісаў, каля Успенскага сабора дзяжурыў аўтобус з сілавікамі, тэрыторыю ўзмоцнена патрулявалі супрацоўнікі міліцыі ў форме і ў цывільным. На пачатку акцыі пяццю супрацоўнікамі МУС была затрыманая адна з актывістак, Алена. Нягледзячы на гэта, збор подпісаў працягвалі іншыя актывісты ў розных месцах. Яны перыядычна мянялі месца дыслакацыі. Агульную колькасць удзельнікаў акцыі ацаніць было складана, бо людзі знаходзіліся па ўсім цэнтры горада невялікімі групамі.
Каля 16-й гадзіны ў раёне Успенскага сабора нікога не было, акрамя ўзмоцненых нарадаў міліцыі, што выклікала ў гараджан, якія гулялі ў цэнтры горада, дыскамфорт.
Актывісты маюць намер і далей працягваць збор подпісаў. Пункты збору плануюць арганізаваць у грамадскіх установах горада (бары, кафэ, рэстараны), некаторыя з іх ужо гатовы прадаставіць свае пляцоўкі.
Для Беларускай службы Польскага Радыё Святаслаў Бруйко
Міліцыя назірае за зборам подпісаў за адстаўку дэпутата ў Віцебску