У Гродне, нягледзячы на тое, што масавай акцыі не было, у цэнтры горада затрымлівалі людзей. Праўда, усіх адпусцілі і не складалі пратаколаў.
На вуліцы і плошчы Савецкай у нядзелю днём было даволі шматлюдна. Многія прыходзілі на калядны кірмаш за падарункамі.
На плошчы ўлады ладзілі канцэрт. І, як адзначаюць праваабаронцы, было заўважна шмат міліцыянтаў у цывільным.
Адна з жанчын распавяла, што шпацыравала з мужам і заўважыла, што людзей затрымліваюць, калі яны маюць хоць якія бел-чырвона-белыя атрыбуты.
Але затрымлівалі нават без такіх атрыбутаў. Вось, што распавёў спадар: «Мы ішлі з сяброўкай на калядны кірмаш. Сустрэлі па дарозе знаёмых, хвілінку перагаварылі. А тут да нас падыходзяць АМАПаўцы і просяць прайсці для высвятлення абставін і ўдакладнення асобы».
Спадар распавёў, што завезлі ў Ленінскі РАУС. Затрыманых было 16 чалавек, яны прасядзелі амаль тры гадзіны. Удакладнілі толькі асабістыя дадзеныя і адпусцілі.
Ён кажа, што хутчэй за ўсё іх затрымлівалі проста для таго, каб настрашыць.
Алесь ЗАВІНОЎСКІ