Вольга Каракіна пачала галадоўку 13 сакавіка, каб падтрымаць Дзмітрыя Фурманава, які галадае ў гродзенскай турме з 11 сакавіка. Фурманава судзяць «па справе Ціханоўскага».
Вольга і Дзмітрый да яго арышту жылі разам. Пасля таго, як Дзмітрыя затрымалі 29 мая, у міліцыю пачалі выклікаць і яе.
Восенню Вольга мусіла з’ехаць у Вільню, дзе зараз жыве і працуе.
Паводле яе самой, пакуль стан здароўя здавальняючы, яна нават ходзіць на працу.
«Я галадаю ў падтрымку Дзімы, каб ён спыніў галадоўку, каб у яго была нагода для гэтага. Вельмі хачу, каб ён спыніў галадоўку, бо і яго бацькі вельмі хвалююцца з гэтай нагоды».
Над Дзмітрыем зараз адбываецца суд. Яго абвінавачваюць на падставе артыкула 342 КК (арганізацыя ці падрыхтоўка дзеянняў, якія груба парушаюць грамадскі парадак).
А галадаць ён пачаў супраць змянення да яго стаўлення ў турме.
На працягу апошняга месяца яго пачалі выводзіць за межы камеры, у тым ліку на шпацыр, у кайданках, як небяспечнага злачынцу.
Алесь Завіноўскі, Гродна