Затрыманых 18 жніўня дырэктарку і галоўную рэдактарку БелаПАН Ірыну Леўшыну, бухгалтарку Кацярыну Боеву і экс-дырэктара Дзмітрыя Наважылава ўчора ў ІЧУ на Акрэсціна наведалі адвакаты. Усе трое палітвязняў у бадзёрым стане. Аднак Леўшына і Боева атрымалі ня ўсе рэчы з перадачы, паведамілі Naviny.by.
Жанчынам аддалі толькі сродкі гігіены. А Леўшынай дазволілі перадаць яшчэ паўбутэлькі вады. Пры гэтым ёй ня выдалі матрац і падушку. У камеры з Леўшынай знаходзіцца яшчэ адна жанчына, а з экс-дырэктарам выдання Наважылавым – тры сукамернікі.
28 жніўня заканчваецца 10 сутак з моманту затрымання супрацоўнікаў БелаПАН. Да гэтага дня павінны вырашыць: вызваліць іх ці ўзяць пад варту.
Ірыну Леўшыну, Кацярыну Боеву і Дзмітрыя Наважылава паводле падазрэння ў арганізацыі беспарадкаў (арт. 342 Крымінальнага кодэксу).
18 жніўня ва ўсіх траіх, а таксама ў супрацоўнікаў БелаПАН Ірыны Турчыной, Аляксандра Зайцава і Захара Шчарбакова прайшлі вобшукі. Турчыну і Шчарбакова адвезлі на допыт, пасля чаго адпусцілі пад падпіску аб невыдаванні. Зайцава праз хваробу на допыт не вазілі, з яго ўзялі абавязацельства аб яўцы.
Сервер БелаПАН канфіскавалі, дзейнасць кампаніі ў Мінску паралізаваная, працу працягвае частка рэдакцыі, якая знаходзіцца за мяжой.
эж