Святлана Ціханоўская ў Вільні правяла перамовы з міністрам замежных спраў Чэхіі Якубам Кулганэкам. Яны абмяркоўвалі падрыхтоўку новых санкцый ЕЗ супраць уладаў Беларусі, расследаванне крымінальных спраў супраць сілавікоў у рамках універсальнай юрысдыкцыі і адкрыццё ў Чэхіі офіса дэмакратычных сіл, паведамляе прэс-служба Ціханоўскай.
Кіраўнік МЗС Чэхіі, які разам з калегамі з іншых краін ЕС удзельнічае ў распрацоўцы новых санкцый, адзначыў, што рэжым Лукашэнкі пагражае не толькі свайму народу, але і ўсёй Еўропе ў святле міграцыйнага крызісу на межах з ЕЗ. Ён заявіў, што прадстаўнікі беларускай улады, адказныя за стварэнне гэтага крызісу, патрапяць пад санкцыі.
Ціханоўская таксама распавяла Кулганеку аб эскалацыі рэпрэсій у Беларусі і апошніх прысудах удзельнікам дэмакратычнага руху. Яна прапанавала ўключыць у санкцыйныя спісы ўсіх суддзяў, пракурораў, следчых і іншых асоб, якія маюць дачыненне да неправамерных прысудаў палітвязням, у тым ліку ўчорашняга прысуду Марыі Калеснікавай і Максіма Знаку.
Ціханоўская таксама абмеркавала з кіраўніком чэшскага МЗС пытанне ўзбуджэння крымінальных спраў у рамках універсальнай юрысдыкцыі. Яна паведаміла, што некалькі беларусаў, якія сталі ахвярамі гвалту сілавікоў і праходзілі рэабілітацыю ў Чэхіі, падалі там пазоў, і ён усё яшчэ разглядаецца. Ціханоўская папрасіла Кулганэка паскорыць працэс, а таксама прапанавала Чэхіі падаць скаргу супраць Беларусі аб парушэнні міжнароднай Канвенцыі супраць катаванняў. Усе доказы для гэтага маюцца, падкрэсліла палітык.
Акрамя таго, Кулганэк праінфармаваў Ціханоўскую, што ў адпаведнасці з даручэннем чэшскага прэзідэнта, якое той даў пасля сустрэчы са Святланай, у Чэхіі цяпер працуюць над стварэннем офіса беларускіх дэмакратычных сіл.
reform.by/эж