Незвычайная гісторыя адбылася з жыхаркай Талачына Кацярынай Васілеўскай. На акаўнце Кацярыны ў сацыяльнай сетцы Telegram знаходзілася інфармацыя ў выглядзе падпіскі на Telegram-канал NEXTA.
Аднак, матэрыялы дзяўчына не распаўсюджвала, падпіску зрабіла падчас пратэстаў 2020 года. Суд прызнаў гэты факт адміністрацыйным парушэннем, пакараў дзяўчыну «суткамі» і канфіскаваў прадмет «адміністрацыйнага парушэння» – смартфон. Вырак быў прадказальным, аднак незвычайным у гэтай гісторыі стала абгрунтаванне такога рашэння Талачынскім раённым судом.
Суддзя пастанавіў арыштаваць Васілеўскую наяўнасцю ў дзейнай Канстытуцыі арт. 52, які абавязвае кожнага, хто знаходзіцца на тэрыторыі Беларусі, выконваць яе Канстытуцыю, законы. А невыкананне ўказанага абавязку цягне, у выпадку з Кацярынай, на адміністрацыйную адказнасць. Але пра арт. 34 Канстытуцыі, які гарантуе кожнаму грамадзяніну права на атрыманне, захоўванне і распаўсюджванне інфармацыі на судовым паседжанні, як і ў судовай пастанове не ўспомнілі.
Для Беларускай службы Польскага радыё Святаслаў Бруйко, Віцебск