Суіскальнікам даюць зразумець, што вакансія дазволіць ім неўзабаве зарабіць на ўласнае аўто. Але адгукацца на такія прапановы не варта, папярэджвае медыя MOST: хутчэй за ўсё гэтая праца звязаная з нелегальнай міграцыяй.
Напрыклад, у Беластоку шукаюць кіроўцаў «для высокааплатнай працы на асабістым або арандаваным аўто ў якасці машыны суправаджэння". Ад работніка патрабуецца ехаць па зададзеным маршруце і дакладваць абстаноўку на дарозе. Для сувязі пазначаны толькі месенджары, некаторыя з іх прывязаны да ўкраінскага нумара.
Прыклад аб'явы па пошуку вадзіцеляў у рускамоўным чаце Польшчы. Скрыншот: MOST
Праца, хутчэй за ўсё, звязана з перавозкай мігрантаў. Шукаць могуць як кур'ераў, так і тых, хто пракладае для іх маршрут.
Справа ў тым, што ў сувязі з вялікай плынню нелегальнай міграцыі памежнікі і паліцэйскія патрулі аглядаюць многія машыны ў памежнай зоне. Таму перавозчыкі спачатку пускаюць пустую машыну, кіроўца якой правярае, дзе стаяць патрулі паліцыі, перадае інфармацыю кур'еру, які вязе мігрантаў.
За дапамогу ў арганізацыі нелегальнай міграцыі прадугледжана пакаранне ў межах крымінальнага кодэкса.
вх