У Беларусі найбольш зарабляюць работнікі ў сферы інфармацыйных тэхналогій і ў галіне здабычы сырой нафты і прыроднага газу, паведаміла начальнік галоўнага ўпраўлення статыстыкі працы Нацыянальнага статыстычнага камітэта Ірына Бандарэнка, аб чым піша Позірк.
«Сярэдні заробак у гэтых відах эканамічнай дзейнасці складае больш за 7 тыс. рублёў, — адзначыла чыноўніца. — У дзейнасці паветранага транспарту — больш за 6 тыс., фінансавай дзейнасці — больш за 4 тыс.».
Паводле яе слоў, у рэгіянальным разрэзе традыцыйна самы высокі заробак у мінчан (3,6 тыс.), самы нізкі — у Віцебскай вобласці (2,3 тыс.).
У пяцёрку раёнаў з самым высокім заробкам уваходзяць Астравецкі (Гродзенская вобласць), Мінскі, Салігорскі і Дзяржынскі (Мінская вобласць), а таксама Рэчыцкі (Гомельская вобласць).
«Сярэдні заробак у гэтых раёнах складае ад 2,9 тыс. да 3,4 тыс. рублёў», — сказала Бандарэнка.
Намінальная налічаная сярэдняя зарплата работнікаў Беларусі ў чэрвені 2025 года склала 2. 717, 8 рубля — на 65, 5 рубля больш (+2, 5%), чым у траўні (2652,3). У снежні 2024-га яна складала 2693,9 рубля, студзені 2025-га — 2427,4, лютым — 2428,1, сакавіку — 2601,8.
нг