Падчас паседжання, якое адбылося ў сераду, Кабінет Міністраў Літвы прыняў рашэнне адкрыць раней за планавую дату два памежныя пункты пропуску з Беларуссю, якія былі зачыненыя ў канцы кастрычніка, паведаміла delfi.lt.
«Улічваючы рашэнні, прынятыя Камісіяй па нацыянальнай бяспецы 18 лістапада гэтага года, аб тым, што абставіны змяніліся і абмежаванні на перасячэнне дзяржаўнай мяжы, устаноўленыя 29 кастрычніка 2025 года (…), больш не патрэбныя, у мэтах забеспячэння ўнутранай бяспекі мэтазгодна адмяніць абмежаванні, устаноўленыя вышэйзгаданай пастановай (…)», – заявіў на пасяджэнні міністр унутраных спраў Уладзіслаў Кандратовіч.
Рух праз гэтыя пункты пропуску аднавіцца з 20 лістапада апоўначы.
«Мы ведаем, што ў беларускага боку ёсць усе інструменты для кантролю над такой незаконнай дзейнасцю на сваёй тэрыторыі, і спадзяемся, што ўраду не давядзецца паўтараць падобныя рашэнні. Аднак магу запэўніць вас, што ў будучыні мы зробім усё магчымае, каб абараніць бяспеку нашых людзей і інтарэсы краіны», – заявіла прэм'ер-міністр Інга Ругінене.
У кастрычніку некалькі разоў з-за залёту метэазондаў з кантрабандай з Беларусі была парушаная праца літоўскіх аэрапортаў. Улічваючы сітуацыю, урад вырашыў закрыць на месяц, то бок да поўначы 30 лістапада, апошнія дзейныя памежныя пункты пропуску з Беларуссю – Меднікі (Каменны Лог) і Салечнікі (Беняконі).
аз