Беларускія НПЗ два гады працавалі на страту нават з ільготнай расійскай нафтай. Вярнуцца да прыбытку яны змогуць толькі цяпер, піша planbmedia.io.
Сутыкнуўшыся з дэфіцытам бензіну з-за нападаў украінскіх дронаў, расійскія ўлады нарэшце папрасілі саюзніка аб дапамозе.
Спачатку гаворка ішла пра пастаўкі 300 тысяч тон бензіну ў год. Потым Масква скараціла патрабаванні. У верасні Беларусь прадала ў Расію 45 тысяч тон бензіну, а ў кастрычніку - 36 тысяч.
«Давальніцкая нафта пачала перапрацоўвацца на нашых двух нафтаперапрацоўчых заводах, нафтапрадукты паступаюць назад у Расію, нешта прадаецца на экспартных рынках, нешта спажываецца ў нас», - сказаў Круты ў інтэрв'ю беларускаму тэлебачанню.
Скарыстаўшыся праблемамі саюзніка, Лукашэнка выгандляваў сабе такія ўмовы паставак, якія дазваляюць беларускім НПЗ працаваць з сярэдняй па краіне рэнтабельнасцю ў 7-8 працэнтаў. Яшчэ нядаўна рэнтабельнасць у іх была глыбока адмоўнай.
Страты пачаліся пасля заканчэння ў Расіі падатковага манеўру. «Нафтан» у пачатку 2024 года страціў 324 мільёны рублёў, Мазырскі НПЗ таксама прызналі стратным. Каб зменшыць мінус, Беларусь была вымушана зніжаць перапрацоўку.
У пачатку года Мазырскі НПЗ перапрацоўваў у месяц 22 тысячы тон пры магутнасці трыццаць тысяч. Зніжэнне аб'ёмаў нафтаперапрацоўкі падкасіла не толькі эканоміку цэлых рэгіёнаў. Яно яшчэ і падарвала беларускі экспарт.
Крыніца: Plan B/юл