На канец траўня 2026 года ў Беларусі ў месцах пазбаўлення волі знаходзілася 854 палітычных зняволеных, у тым ліку 112 жанчын, вынікае са штомесячнага агляду сітуацыі з правамі чалавека, апублікаванага праваабарончым цэнтрам «Вясна«.
За месяц праваабаронцы прызналі палітвязнямі 32 чалавекі.
Падкрэсліваецца, што зніжэнне колькасці новых прызнанняў палітвязнямі не азначае змяншэння маштабаў рэпрэсій: праваабаронцам усё складаней атрымліваць інфармацыю праз тое, што ўлады не даюць яе ў публічны доступ і ўзмацняюць ціск на людзей, якія паведамляюць пра пераслед.
Колькасць былых палітвязняў склала 3.833, мінімум 170 палітвязняў знаходзяцца ў асабліва ўразлівым становішчы па стане здароўя, з-за ўзросту або абставінаў зняволення.
З 2020 года мінімум 9.792 чалавекі сутыкнуліся з палітычна матываваным крымінальным пераследам і мінімум 8.477 асуджаны, у тым ліку завочна. Гэтыя паказчыкі «працягваюць расці кожны месяц, хоць праваабаронцы істотна абмежаваныя ў магчымасцях атрымання інфармацыі аб пераследзе», адзначаецца ў дакладзе.
У траўні зафіксавана больш за 30 ператрусаў у актывістаў, якія знаходзяцца ў вымушанай эміграцыі, у шэрагу выпадкаў ператрусы былі звязаныя з выбарамі ў Каардынацыйную раду і мерапрыемствамі да Дня Волі.
Крыніца: «Позірк»/юл