Абвінавачанне прасіла пакараць бацьку і дачку пазбаўленнем волі на тры з паловай і тры гады адпаведна. Апроч таго, Кірыл Пазняк мусіць заплаціць штраф у 550 базавых велічыняў (24750 рублёў). Пра гэта стала вядома з крыніц «Белсату».
Бацьку і дачку абвінавацілі паводле двух артыкулаў — 361-1 і 369-1 Крымінальнага Кодэкса Беларусі — у «стварэнні экстрэмісцкага фармавання» і «дыскрэдытацыі Рэспублікі Беларусь». Кірыла і Яніну Пазнякоў затрымалі летась 3 верасня. У той жа дзень КДБ прызнаў YouTube-канал «Платформа 375», які стварыў Кірыл Пазняк, «экстрэмісцкім фармаваннем». У крымінальнай справе і журналіст, і ягоная дачка прызнаны арганізатарамі. Уся віна Яніны палягае ў тым, што яна зарэгістравала канал у TikTok.
На «Платформе 375» Пазняк асвятляў эканамічныя і палітычныя падзеі ў краіне. У 2021-м і ў 2022-м ён быў мадэратарам онлайн-дэбатаў паміж праўладнымі прапагандыстамі і іх апанентамі, якія вымушаныя былі пакінуць краіну праз пагрозу рэпрэсій.
Разгляд справы пачаўся 17 чэрвеня. Першае паседжанне суда было прызначанае на 14 траўня, але праз цяжкі стан здароўя журналіста яго давялося перанесці. У ізалятары на вуліцы Акрэсціна Кірыл Пазняк перанёс COVID-19 і цяжкую пнеўманію, якая дала ўскладненні на лёгкія. Некалькі дзён ён правёў на апараце штучнага дыхання. Кірыл праходзіў лячэнне ў турэмным шпіталі.
Пакуль прысуд не набудзе законнай моцы, Кірыл Пазняк і ягоная дачка Яніна будуць знаходзіцца ў следчым ізалятары. Тэрмін утрымання пад вартай падчас следства суд залічыў з разліку дзень за паўтара.
Вясна/ав