У Мінску замест шматдзетных сем’яў у новы жылы дом засялілі супрацоўнікаў Службы бяспекі Аляксандра Лукашэнкі. Пра гэта паведамляе выданне «Люстэрка», якое правяло ўласнае расследаванне.
Паводле звестак журналістаў, у доме № 74 на вуліцы Валгаградскай больш за палову кватэр надежаць супрацоўнікам Службы бяспекі. Каля двух дзясяткаў жылых памяшканняў знаходзяцца ў аператыўным кіраванні гэтай структуры, а сярод новых уласнікаў — дзясяткі супрацоўнікаў, у тым ліку асабістыя целаахоўнікі Лукашэнкі. Іх асобы журналісты ідэнтыфікавалі з дапамогай адкрытых крыніц, фотаздымкаў з афіцыйных мерапрыемстваў і інфармацыі з уцечак баз даных.
Дом уваходзіць у новы квартал, які будавалі ў 2023–2025 гадах. Раней мінскія ўлады заяўлялі, што ўсе пяць шматпавярховікаў прызначаныя для грамадзян, якія стаяць у чарзе на паляпшэнне жыллёвых умоў, у першую чаргу для шматдзетных сем’яў. Аднак для дома № 74, у адрозненне ад астатніх, журналісты не знайшлі праектнай дэкларацыі з такімі ўмовамі.
Паводле расследавання, многія супрацоўнікі Службы бяспекі набылі кватэры з выкарыстаннем льготных крэдытаў ад «Беларусбанка». Некаторыя пасля атрымання жылля ўжо выставілі яго на продаж па цэнах, якія значна перавышаюць першапачатковы кошт.
Расследаванне таксама паказвае, што разам са службоўцамі ў доме атрымалі кватэры асобныя супрацоўнікі МУС і Мінгарвыканкама, а некалькі кватэр былі перададзены Аператыўна-аналітычнаму цэнтру пры Лукашэнку.
нг