Прэс-сакратар урада Пётр Мюлер заявіў, што арганізацыя судовай сістэмы зʼяўляецца выключнай кампетэнцыяй дзяржаў-членаў Еўрапейскага Звязу. Мюлер гаварыў пра гэта ў кантэксце пастановы Суда Еўрапейскага Звязу, які загадаў Польшчы прыпыніць Дысцыплінарную палату Вярхоўнага суда.
Пётр Мюлер падкрэсліў, што не толькі Польшча сумняваецца ў паўнамоцтвах СЕЗ:
- Калі б мы паглядзелі на апошнія выракі Суда Еўрапейскага Звязу, напрыклад па пытанні часу працы ваенных у Францыі, ці па дадзеных, якія захоўваюць тэлекамунікацыйныя кампаніі, то мы ўбачым, што ўрад і французскія суды выказваюць пярэчанні адносна рашэнняў СЕЗ. У Іспаніі таксама Канстытуцыйны і Вярхоўны суды не згодныя з рашэннем Суда Еўрапейскага Звязу па пытанні імунітэта дэпутатаў з Каталоніі. То бок, з прысудамі СЕЗ нязгодная не толькі Польшча, але і іншыя краіны ЕЗ.
Пётр Мюлер заявіў, што Суд Еўразвязу цяпер выходзіць за рамкі абавязацельстваў па вынясенні прысудаў у галіне дагавораў ЕЗ. Ён дадаў, што далейшыя сумневы ў функцыях і рашэннях Суда могуць нанесці шкоду еўрапейскай інтэграцыі.
яс