Улады Польшчы шукаюць бацькоў 13-гадовага афганца

 Агулам Польшча ўжо эвакуявала з Афганістана каля 750 чалавек.

13-ці гадовы Фавад

Крыніца: https://twitter.com/michaldworczyk

Польскія ўлады шукаюць сям'ю 13-гадовага Фавада з Кабула. Хлопчык знаходзіцца пад наглядам палякаў, якія ладзяць эвакуацыю з захопленага талібамі Афганістана. 13-гадовы хлопец згубіўся пры спробе ўцёкаў з афганскай сталіцы. Па дапамогу ў пошуках звярнуўся кіраўнік канцылярыі прэмʼер-міністра Міхал Дворчык.

«Фавад падчас спробы эвакуацыі страціў сваю сямʼю. Ён быў выратаваны ў надзвычай складаных умовах польскімі салдатамі. З нядзелі яны спрабуюць знайсці яго блізкіх. Інфармацыя была перададзена ў няўрадавыя арганізацыі», – напісаў у Twitter Міхал Дворчык.

Thirteen-year-old Fawad lost his family while trying to evacuate. He was rescued by Polish soldiers. The search for his relatives has been going on since sunday. The information was sent to non-governmental organizations. Huge request for #RT and engagement! #FawadFamily pic.twitter.com/s5q9LWLgsd

— Michał Dworczyk (@michaldworczyk) August 24, 2021

Сітуацыя вакол абложанага афганцамі аэрапорта ў Кабуле вельмі складаная, там пануе хаос. Тысячы людзей спрабуюць пранікнуць у ваенныя самалёты, на якіх ладзіцца эвакуацыя. Раніцай у Варшаве прызямліўся яшчэ адзін самалёт з людзьмі, эвакуяванымі з Кабула. На борце знаходзіліся 116 чалавек, у тым ліку 37 дзяцей ва ўзросце да пяці гадоў. Агулам Польшча ўжо эвакуявала з Афганістана каля 750 чалавек.

iar/эж