Пасля двухмесячных вакацыяў сёння вучні ў Польшчы пачынаюць новы навучальны год. Міністр адукацыі і навукі Пшэмыслаў Чарнэк(Przemysław Czarnek) заявіў, што школы будуць працаваць у адпаведнасці з правіламі да пандэміі, то бок стацыянарна.
«Каб мінімізаваць рызыку заражэння каранавірусам, школы атрымаюць сродкі індывідуальнай абароны», – сказаў міністр.
Школы таксама атрымаюць навучальныя матэрыялы і планы ўрокаў па прафілактыцы інфекцый. З пачатку года таксама будуць праводзіцца ўрокі па заахвочванні да вакцынацыі.
Пшэмыслаў Чарнэк заявіў, што пакуль вяртанне да дыстанцыйнага навучання не разглядаецца:
-Дзеці не з'яўляюцца самай вялікай крыніцай інфекцый. Яны адказваюць прыкладна за 4% інфекцый. У большай ступені – гэта дарослыя заражаюць дзяцей, чым дзеці дарослых, таму я не баюся вяртання вучняў у школы.
У школах будуць працягваць дзейнічаць правілы санітарнага рэжыму. Вучні будуць насіць маскі ў агульных памяшканнях школы, напрыклад на калідорах.
IAR/аз