Рада Бяспекі ААН збіраецца на пазачарговым паседжанні па сітуацыі на польска-беларускай мяжы. Слуханні, якія пройдуць у закрытым рэжыме, скліканыя па ініцыятыве Францыі, Эстоніі і Ірландыі. Генеральны сакратар ААН Антоніу Гутэрыш занепакоены сітуацыяй на польска-беларускай мяжы. Яго прэс-сакратар Стэфан Дзюжарык заявіў, што згаданая сітуацыя «не павінна выкарыстоўвацца ў палітычных мэтах або ствараць напружанасць паміж дзяржавамі».
Старшыня Еўракамісіі Урсула фон дэр Ляен заявіла, што крызіс на польска-беларускай мяжы – гэта не міграцыйны крызіс, а спроба дэстабілізаваць суседнюю краіну. Пасля сустрэчы з прэзідэнтам ЗША Джо Байдэнам у Вашынгтоне Урсула фон дэр Ляен заявіла, што Еўрасаюз і ЗША ўвядуць новыя санкцыі супраць Беларусі. Яна падкрэсліла, што сітуацыя на мяжы з'яўляецца праблемай не толькі для Польшчы, а для ўсяго Еўрасаюза, які мае намер размаўляць з краінамі Блізкага Усходу, каб спыніць выезд мігрантаў у Беларусь.
Кіраўнік дыпламатыі Еўрасаюза Жазэп Барэль ад імя 27 краінаў-сябраў заявіў, што маштаб дзеянняў беларускага рэжыму на мяжы супольніцтвам у апошнія дні выклікае занепакоенасць. Ён падкрэсліў, што інструментальная эксплуатацыя мігрантаў у палітычных мэтах непрымальная. Ён аб’яцаў, што Еўрасаюз будзе змагацца з незаконнай міграцыяй шляхам пашырэння санкцый.
Амбасадары краін-сябраў дамовіліся на сустрэчы ў Бруселі запусціць механізм крызіснага кіравання ў сувязі з сітуацыяй на мяжы. У панядзелак гэтую праблему абмяркуюць міністры замежных спраў краін-сябраў ЕС.
IAR/аз