У адказ на жорсткае ўварванне расійскіх войскаў ва Украіну Злучаныя Штаты Амерыкі, пасля кансультацыяў з партнёрамі, накладуць дадатковыя эканамічныя санкцыі на Расію і Беларусь.
«Мы адключым Беларусь ад імпарту ключавых тэхналогіі, і калі Лукашэнка працягне падтрымліваць гэтую вайну, наступствы будуць яшчэ большымі», – сказаў Энтані Блінкен.
Кіраўнік амерыканскай дыпламатыі таксама паведаміў, што супраць Расіі былі ўведзеныя новыя санкцыі. «Пад санкцыі падпадаюць 22 суб'екты, звязаныя з абароннай прамысловасцю, у тым ліку кампаніі, якія вырабляюць самалёты, баявыя машыны, беспілотнікі, ракеты, сістэмы радыёэлектроннай барацьбы – усё, што выкарыстоўваецца для нападу на ўкраінскі народ», – сказаў Блінкен і запэўніў, што ЗША будуць працягваць падтрымліваць украінскія ўзброеныя сілы.
Учора ў сілу ўвайшлі таксама эканамічныя санкцыі супраць Беларусі, прынятыя Еўрасаюзам. У прыватнасці ЕС спыніў імпарт беларускай прадукцыі такіх сектараў, як мінеральнае паліва, тытунь, драўніна, цэмент, жалеза і сталь. Уводзіцца блакада для гумавых вырабаў, калію, бітумных рэчываў і газавай вуглевадароднай вытворчасці. Таксама дзейнічаюць абмежаванні на экспарт некаторых тавараў і тэхналогій, якія могуць выкарыстоўвацца ў ваеннай галіне ў Беларусі. Абмяжоўваюцца таксама паслугі з гэтым звязаныя.
Раней уступілі ў сілу персанальныя санкцыі ў дачыненні да больш чым 20 беларускіх чыноўнікаў і высокапастаўленых вайскоўцаў. Ім забаронены ўезд у ЕС, а іх актывы ў Еўропе замарожваюцца.
IAR/аз/яс