Прэзідэнт Польшчы Анджэй Дуда знаходзіцца з візітам у Кіеве на запрашэнне прэзідэнта Украіны Уладзіміра Зяленскага. Дарадчык прэзідэнта Польшчы Павел Шрот (Paweł Szrot) паведаміў падчас прэс-канферэнцыі ў Варшаве, што галоўнай тэмай перамоваў лідараў у Кіеве будзе падтрымка Украіны:
- Падтрымка ў пастаўках узбраення, неабходнага згаданай краіне, каб абараняцца ад агрэсара, а таксама эканамічная, гуманітарная і палітычная падтрымка. Гэтага будуць тычыцца перамовы. Пазней прэзідэнты Дуда і Зяленскі прымуць удзел у анлайн-сустрэчы Крымскай платформы.
Нагадваем, міжнародны саміт Крымскай платформы пройдзе ў другі раз і будзе прысвечаны акупаванаму расіянамі паўвостраву.
Кіраўнік МЗС Украіны Дзмітрый Кулеба паведаміў, што ў сустрэчы возьмуць удзел прадстаўнікі каля 60 краін і міжнародных арганізацый. На ўзроўні прэзідэнтаў і кіраўнікоў урадаў будуць прадстаўлены 40 краін. Неафіцыйна вядома, што прынамсі частка з іх прыедзе ў Кіеў.
IAR /аз