Старшыня парламенцкага камітэту па замежных справах польскага Сейма Радаслаў Фогель заявіў, што падчас саміту ў Вільні паўночна-атлантычны альянс павінен вызначыць перспектыву ўступлення Украіны ў НАТА. Радаслаў Фогель знаходзіцца ў Вашынгтоне, дзе разам са сваімі калегамі з Украіны, Літвы, Чэхіі ды Іспаніі ён сустрэўся з прадстаўнікамі амерыканскага ўраду і парламенту.
Радаслаў Фогель сказаў, што краіны Цэнтральнай і Усходняй Еўропы падтрымліваюць сяброўства Украіны ў НАТА, але амерыканскія палітыкі і грамадскасць да гэтага яшчэ не падрыхтаваныя.
- Мы б хацелі, каб рэзультатам саміту НАТА ў Вільні стала вызначэнне канкрэтнай перспектывы ўступлення Украіны ў НАТА.
Старшыня парламенцкага камітэту па замежных справах дадаў, што цяпер сяброўства Украіны ў НАТА ўжо не выглядае немагчымым. Падчас візіту ў Вашынгтон Фогель і яго калегі з іншых краінаў таксама ўзялі ўдзел у канферэнцыі Каліноўскага ў Амерыканскім кангрэсе, прысвечанай сітуацыі ў Беларусі.
Радаслаў Фогель сказаў, што перамога Украіны можа падтрымаць таксама імкненне беларусаў да свабоды.
- Перспектыва перамогі Украіны можа быць вельмі істотнай для Беларусі. Калі ўдасца перамагчы Расію, таксама і рэжым Лукашэнкі можа пачаць развальвацца.
З чацвярга ў сустрэчах з амерыканскімі кангрэсменамі ўдзельнічае міжнародная дэлегацыя кіраўнікоў камітэтаў па замежных справах парламентаў. Іх задача – пераканаць палітыкаў падтрымаць сяброўства Украіны ў НАТА і аказваць больш рашучую дапамогу Кіеву ў барацьбе з расійскай агрэсіяй.
iar/нг