Польскія ўлады сочаць за бяспекай у краіне ў сувязі з тэрактам у Падмаскоўі

Прэзідэнт Анджэй Дуда атрымлівае аператыўную інфармацыю. 

Прзідэнт Польшчы Анджэй Дуда (Andrzej Duda).

Фота: PAP/Paweł Supernak

Польскія ўлады сочаць за сітуацыяй пасля тэракту ў Маскве. Прэм'ер-міністр Дональд Туск паведаміў, што кіраўнікі Міністэрства нацыянальнай абароны, Міністэрства ўнутраных спраў і адміністрацыі і каардынатар спецслужбаў інфармуюць яго аб абставінах атакі ў Маскве і магчымым уплыве на сітуацыю ў рэгіёне і бяспеку Польшчы.

«У сувязі з тэрактам пад Масквой мы пастаянна сочым за сітуацыяй», – заявіў міністр нацыянальнай абароны Уладзіслаў Касіняк-Камыш. «Я кантактую з Генштабам Войска Польскага, усімі службамі і нашымі саюзнікамі. Мы аналізуем гэтую сітуацыю з пункту гледжання яе магчымага ўплыву на бяспеку Польшчы», – напісаў ён у сацсетках.

W związku ze strzelaniną pod Moskwą stale monitorujemy sytuację. Jestem w kontakcie ze @SztabGenWP, wszystkimi służbami oraz naszymi sojusznikami. Analizujemy tę sytuację pod względem możliwego wpływu na bezpieczeństwo Polski.

— Władysław Kosiniak-Kamysz (@KosiniakKamysz) March 22, 2024

Міністр замежных спраў Радаслаў Сікорскі ў эфіры тэлеканала TVN заявіў, што «цяпер надта мала інфармацыі, каб пра што-небудзь гаварыць з упэўненасцю». Кіраўнік польскай дыпламатыі падкрэсліў пры гэтым, што Польшча асуджае тэрарызм у любой форме.

Кіраўнік Бюро нацыянальнай бяспекі Яцэк Севера заявіў, што прэзідэнт Анджэй Дуда атрымлівае аператыўную інфармацыю. «Галоўнакамандуючага Узброенымі сіламі рэгулярна інфармуюць аб ходзе падзей на тэрыторыі Расійскай Федэрацыі і іх магчымых наступствах для бяспекі польскіх грамадзян. Я хачу падзякаваць міністру нацыянальнай абароны, нацыянальнай і партнёрскім службам за супрацу», – напісаў прэзідэнцкі міністр на сайце «Х».

Пасол Польшчы ў Расіі Кшыштаф Краеўскі паведаміў, што сочыць за сітуацыяй у Маскве пасля тэракту.

IAR/TVN

нг