Ці спецслужбы (Агенцтва ўнутранай бяспекі) дапусцілі памылкі пры праверцы людзей, якія атрымалі польскія візы? На гэтае пытанне перад камісіяй па расследаванні візавага скандалу адказваюць былыя кіраўнікі спецслужбаў Пётр Краўчык і Барташ Ярмушкевіч. Частку паказанняў засакрэцілі.
Старшыня камісіі Міхал Шчэрба лічыць, што паказанні Пятра Краўчыка далі карціну функцыянавання дзяржавы ў гэтай галіне.
На думку прадстаўнікў урадавай кааліцыі, падчас урада партыі «Права і справядлівасць» былі парушэнні ў польскіх візавых праграмах — перш за ўсё, у Poland Business Harbor, якая была прызначаная для прыцягнення IT-спецыялістаў, у асноўным з Беларусі. Паводле членаў камісіі, такія візы маглі атрымаць людзі, якія насамрэч не жадалі працаваць у Польшчы, і прынамсі ў адным выпадку гэта быў нават расійскі шпіён.
«Як сцвярджае сведка, спецслужба не атрымлівала неабходных інвестыцый, таму канкрэтнае абвінавачванне, якое было сфармулявана сёння — у тым, што служба не мела адпаведных паўнамоцтваў, але таксама сродкаў і рэсурсаў для супрацьдзеяння рознага роду пагрозам. Па-другое, у Польшчы не было прадуманай міграцыйнай палітыкі, як, напрыклад, у Канадзе ці Аўстраліі», — сказаў Міхал Шчэрба.
- Мы паказалі, што расійскія фірмы бралі пад кантроль беларусаў – кампаніі з ІТ-галіны. Гэта, несумненна, быў канал перакідвання людзей у Еўропу. Так выглядаюць факты, якія ёсць у дакументах – 3050 візаў, выдадзеных грамадзянам расійскай Федэрацыі са студзеня 2022 года да студзеня 2024 года.
Дэпутат ад ПіС Пётр Калета заявіў, што парушэнняў не было шмат, яны былі ліквідаваныя, а службы дзейнічалі карэктна. Дэпутат назваў абсалютнай лухтой заявы аб тым, што праграма стала каналам прыбыцця мігрантаў і расійскіх шпіёнаў.
- Гэта такая лухта, што я сапраўды ўжо не ведаю, як да гэтага ставіцца. Часам я думаю наконт засакрэчвання пытанняў, якія задаюць прадстаўнікі Грамадзянскай платформы – добра, што яны засакрэчаныя, бо гэта проста кампраметацыя. Гэтая камісія непатрэбная, ніякага скандалу не было. Я толькі пацвярджаю тое, што скажуць усе сведкі.
Следчая камісія Сейма правярае, у першую чаргу, ці былі выпадкі карупцыі пры выдачы польскіх віз за мяжой. Аднак на павестцы і іншыя пытанні — у тым ліку дзейнасць такіх праграм, як Poland Business Harbor.
IAR/нг