Падчас сумеснай прэс-канферэнцыі пасля сустрэчы з прэзідэнтам Анджэем Дудам прэзідэнт Літвы спаслаўся на ініцыятыву Польшчы, каб краіны-члены НАТА павялічылі выдаткі на абарону з 2 да 3% ВУП.
«Літва ўжо выйшла на ўзровень 3% ВУП, і мы не будзем спыняцца на гэтым, таму што нас натхняе прыклад Польшчы», — сказаў Гітанас Наўседа.
Прэзідэнт Літвы таксама казаў пра неабходнасць працягваць падтрымку Украіны і яе імкнення да сяброўства ў Еўрасаюзе ў кантэксце перамоваў аб уступленні.
«Я спадзяюся, што з польскім энтузіязмам і рашучасцю мы зможам надаць украінскім пытанням яшчэ большы прыярытэт, каб украінцы далучыліся да той Еўропы, якой яны заслугоўваюць», — сказаў прэзідэнт Літвы.
Украіна і Малдова афіцыйна пачалі перамовы аб уступленні ў ЕС у канцы чэрвеня.