Дзесяць замежнікаў былі ўзнагароджаныя медалямі Virtus et Fraternitas за дапамогу палякам падчас Другой сусветнай вайны.
Ад імя сваёй маці Вальбарг Свенсан-Бернацкай узнагароду атрымаў Рамуальд Караль Бернацкі. Маці падчас вайны дапамагала польскім ваеннапалонным, падтрымлівала палякаў пасля 1947 года, а ў 1980-я арганізоўвала пасылкі для сем’яў у Польшчы:
-Нарвежцы пачалі высылаць пасылкі, клалі паштоўкі з адрасам, а ў адказ пачалі наладжвацца непасрэдныя кантакты, сям’я для сям’і. З 1981 па 1992 яна арганізавала адпраўку 50-60 грузавікоў з пасылкамі.
Сярод лаўрэатаў прэміі - Марта Гамер. Аўстрыйская настаўніца стварыла Мемарыяльны камітэт канцлагера Гузена па ўшанаванні памяці ахвяр нямецкага канцэнтрацыйнага лагера ў Аўстрыі, праводзіць даследчыя праекты і збірае памятныя рэчы для Мемарыяльнага музею.
- Першапачаткова гэта былі лісты, якія вязні пісалі родным раз на месяц, лагерныя дакументы — пропускі, дакументы, звязаныя з вызваленнем лагера, пасведчанні асобы, сабраныя амерыканцамі пасля вызвалення лагера.
Марта Гамер
Узнагароджаны таксама венгр — Фэрдынанд Леа Міклошы, паплечнік Юзафа Анталя, які ў 1939 годзе дапамагаў прымаць уцекачоў з Польшчы і падтрымліваць іх у Венгрыі. Быў карэспандэнтам «Dziennik Zachodni» і рэдагаваў «Węgierski Kurier Polski». Арганізоўваў дапамогу польскаму войску.
Ордэн Virtus et Fraternitas прысуджаецца прэзідэнтам Рэспублікі Польшча па ініцыятыве дырэктара Інстытута Пілецкага замежнікам, якія аказвалі дапамогу польскім грамадзянам падчас Другой сусветнай вайны.
Узнагароды ўручыў намеснік кіраўніка прэзідэнцкай канцылярыі Пётр Цвік. Ён зачытаў ліст, у якім Анджэй Дуда падкрэсліў, што ўзнагароджаныя з'яўляюцца ўзорам вялікай мужнасці і міжчалавечай салідарнасці ў дапамозе пераследаваным палякам, а таксама прыкладам гераізму, нягледзячы на пагрозу пераследу і рэпрэсій.
Усяго медалі атрымалі 78 чалавек з 13 краін, у тым ліку з Францыі, Украіны, Венгрыі, Славакіі, Чэхіі, Румыніі, ЗША і Казахстана.
ав