Міністэрства замежных спраў Польшчы адклікала дазвол на дзейнасць Генеральнага консульства Расійскай Федэрацыі ў Кракаве. Гэтае рашэнне прынятае пасля з’яўлення інфармацыі аб датычнасці расійскіх спецслужбаў да падпалу гандлёвага цэнтра «Марывільска» ў Варшаве.
Міністр замежных спраў Польшчы Радаслаў Сікорскі падчас прэс-канферэнцыі ў Лондане заявіў, што Польшча не будзе цярпець акты сабатажу на сваёй тэрыторыі:
— Цудам там ніхто не загінуў. Мы не можам мірыцца з такімі дзеяннямі. Польшча і заходнія дэмакратыі не праводзяць актаў сабатажу на тэрыторыі Расіі. Расія нават не мае права разлічваць на прапарцыйныя дзеянні ў адказ. Аднак мы чакаем, што Масква зробіць у адказ крокі, у тым ліку ў дачыненні да нашых консульскіх устаноў, — адзначыў Сікорскі.
Ён таксама заклікаў іншыя краіны Еўрапейскага саюза абмежаваць свабоду перамяшчэння расійскіх дыпламатаў. Паводле Сікорскага, гэта павінна ўскладніць працу расійскіх агентаў на тэрыторыі ЕС:
— Расіяне не павінны карыстацца перавагамі Шэнгенскай зоны, — падкрэсліў кіраўнік польскай дыпламатыі.
У Маскве ўжо паабяцалі, што адказ на дзеянні Варшавы будзе «рашучым». У Расіі Польшча мае амбасаду ў Маскве і консульствы ў Іркуцку і Калінінградзе.
IAR/PAP/ez