Непадалёк ад выспы Волін (Заходняя Памеранія) выяўлена вялікае радовішча нафты і прыроднага газу. Паводле падлікаў экспертаў, там знаходзіцца каля 22 млн тон нафты і пяць мільярдаў кубаметраў газу. Увогуле, у акваторыі каля вострава можа залягаць больш за 33 млн тон нафты і 27 млрд кубаметраў газу.
Войцех Якубік з Цэнтра энергетычнай бяспекі адзначыў, што названыя аб’ёмы прыблізна адпавядаюць гадавому спажыванню гэтых рэсурсаў у Польшчы:
— Нашы нафтаперапрацоўчыя заводы штогод выкарыстоўваюць каля 27 млн тон нафты, а газу — каля 17 млрд кубаметраў. Таму выяўленае радовішча нельга назваць надзвычай вялікім. Аднак сам факт таго, што прыватны інвестар зацікавіўся пошукам радовішчаў у Балтыйскім моры і здолеў нешта знайсці, можа палепшыць інвестыцыйны клімат. У кантэксце ўсёй Еўропы гэта асабліва актуальна.
Аб адкрыцці паведаміла кампанія Central European Petroleum (CEP). Свідравіна размешчана прыблізна за шэсць кіламетраў ад горада Свінауйсце і размешчана на глыбіні трох кіламетраў.
Паводле прадстаўнікоў кампаніі, знойдзенае радовішча з’яўляецца найбуйнейшым традыцыйным радовішчам вуглевадародаў, калі-небудзь выяўленым у Польшчы, і адным з найбуйнейшых радовішчаў нафты, знойдзеных у Еўропе за апошнія дзесяць гадоў.
IAR/эж