З чэрвеня па ліпень бягучага году палякі будуць вырашаць, што зрабіць са сваймі сродкамі, назапашанымі ў Адкрытых пенсійных фондах. Гаворка ідзе пра тое, ці пералічыць іх на Індывідуальныя пенсійныя рахункі, ці ў Ведамства сацыяльнага страхавання.
Як заявіў Вальдэмар Буда (Waldemar Buda) з Міністэрства фондаў і рэгіянальнай палітыкі, урад будзе заахвочваць грамадзянаў перавесці сродкі на Індывідуальныя пенсійныя рахункі.
- Па многіх прычынах Індывідуальныя пенсійныя рахункі - гэта больш прывабны выбар. Мы будзем заахвочваць да гэтага, паколькі лічым, што гэтыя грошы будуць інвеставаныя з карысцю для ўладальнікаў. Па-другое, сродкі на Індывідуальных пенсійных рахунках стануць прыватнай уласнасцю. Гэта азначае, што ніякія рэформы пенсійнай сістэмы ў будучыні не будуць іх датычыць. Па-трэцяе, яны будуць спадчыннымі.
Аднак ад сродкаў, пералічаных на Індывідуальныя пенсійныя рахункі, трэба будзе заплаціць падатак у памеры 15%. Такога падатку не трэба будзе плаціць, калі сродкі будуць пераведзеныя ў Ведамства сацыяльнага страхавання.
Вальдэмар Буда падкрэслівае, што кожная выплата сродкаў з дзяржаўнага сектара абкладзеная падаткам. Такім чынам адбываецца і ў выпадку пенсіі, якую выплочвае Ведамства сацыяльнага страхавання.
Сродкі на будучыя пенсіі ў Адкрытыя пенсійныя фонды пералічалі амаль 16 мільёнаў палякаў. Агульная сума гэтых зберажэнняў складае 162 млрд злотых, гэта ў сярэднім звыш 10 тысяч злотых на чалавека.
аз